शिवसेना (उद्धव बाळासाहेब ठाकरे) पक्षाच्या रत्नागिरी तालुकाप्रमुख पदी मयुरेश्वर पाटील

शिवसेना (उद्धव बाळासाहेब ठाकरे) पक्षाचे पक्षप्रमुख श्री. उद्धव ठाकरे यांच्या मार्गदर्शनाखाली रत्नागिरी जिल्ह्यात पक्ष संघटना अधिक मजबूत करण्यासाठी महत्त्वपूर्ण फेरबदल करण्यात आले आहेत. शिवसेनेचे सचिव तथा माजी खासदार माननीय श्री. विनायक राऊत आणि रत्नागिरी जिल्हाप्रमुख श्री. दत्ताजी कदम यांच्या शिफारसीनुसार, रत्नागिरी तालुकाप्रमुख पदाची जबाबदारी कट्टर शिवसैनिक श्री. मयुरेश्वर पाटील यांच्याकडे सोपवण्यात आली आहे.मयुरेश्वर पाटील यांचा प्रवास हा एका सामान्य शिवसैनिक कार्यकर्त्यापासून सुरू झाला. अनेक वर्षांपासून पक्षाच्या प्रत्येक आंदोलनात, जनसेवेच्या कार्यात आणि संघटन बांधणीत त्यांनी दिलेले योगदान उल्लेखनीय आहे. पक्षप्रती असलेली त्यांची अविचल निष्ठा आणि तळागाळातील कार्यकर्त्यांशी असलेला दांडगा जनसंपर्क लक्षात घेऊन, वरिष्ठ नेत्यांनी त्यांच्यावर हा विश्वास टाकला आहे.या निवडीनंतर बोलताना मयुरेश्वर पाटील म्हणाले की, “हा माझ्यासारख्या एका छोट्या कार्यकर्त्याचा सन्मान आहे. पक्षप्रमुख उद्धवजी ठाकरे साहेब, युवासेना प्रमुख आदित्यजी ठाकरे साहेब, आमचे मार्गदर्शक विनायकजी राऊत साहेब आणि जिल्हाप्रमुख दत्ताजी कदम साहेब यांनी माझ्यावर जी जबाबदारी सोपवली आहे, ती मी पूर्ण निष्ठेने पार पाडेन. येणाऱ्या काळात रत्नागिरी तालुक्यात शिवसेनेचा भगवा अधिक डौलाने फडकवण्यासाठी आणि पक्ष संघटना तळागाळापर्यंत पोहोचवण्यासाठी मी कटिबद्ध असेन.”या नियुक्तीबद्दल रत्नागिरीतील शिवसैनिकांनी आनंद व्यक्त केला असून, एका कष्टाळू आणि निष्ठावंत कार्यकर्त्याला न्याय मिळाल्याची भावना सर्वत्र उमटत आहे.